Posted by
“ആ നിർത്ത് നിർത്ത്…..”
അവൻ കൈ കാണിച്ച് വഴിയിലേക്ക് കയറി നിന്നതും പ്രിയ ബ്രേക്ക് ചെവിട്ടി, വണ്ടി ഓഫാകാതിരിക്കാൻ ന്യൂട്രൽ ഇട്ടു കാലുകൾ നിലത്തൂന്നി ബാലൻസ് ചെയ്തുനിന്നു…. നന്ദുവിന്റെ കണ്ണുകളിലെ കൃഷ്ണമണികൾ സമനില നഷ്ടമായതുപോലെ ഇടത്തേക്കും വലത്തേക്കും നീങ്ങി ചുറ്റും നിൽക്കുന്നവരെ വീക്ഷിച്ചു…… തങ്ങളെ ജീവനോടെ തിന്നാനുള്ള പകയോടെ നിൽക്കുന്ന ആദർശിനെയും തസ്വീഹിനെയും കണ്ട് ഉള്ളം വിറച്ചു… കഴിഞ്ഞ ദിവസം ക്ലാസ്സിൽ ഉണ്ടായ സംസാരത്തെ കുറിച്ച് പ്രിയ നന്ദുവിനോട് പറഞ്ഞിരുന്നു….
“എന്താ…..”
മുന്നിൽ നിൽക്കുന്ന കാശിയെ രൂക്ഷമായി നോക്കി പ്രിയ ചോദിച്ചു….
“നിന്നോട് ആരാടി വണ്ടി അകത്തേക്ക് കേറ്റാൻ പറഞ്ഞത്….ബൈക്കിൽ വരാൻ തത്കാലം സീനിയഴ്സ് ചേട്ടന്മാരിവിടെ ഉണ്ടുട്ടോ……”
അവൻ അവളുടെ ചുമലിൽ രണ്ട് തട്ടുതട്ടി ബൈക്കിന്റെ ചാവി ഊരാൻ തുനിഞ്ഞു….
“താക്കോൽ എവിടെയാടി….”ബൈക്കിന്റെ താക്കോൽ പഴുത് ശൂന്യമാണെന്ന് കണ്ട് കാശി ശബ്ദം ഉയർത്തി
“ക്ലെച്ച് പിടിച്ച് ഗിയർ മാറ്റിയാൽ വണ്ടി ഓടിക്കോളും…. അതിനി സീനിയർ ആയാലും ജൂനിയർ ആയാലും….ഞാൻ എന്റെ കാശിന് ലൈസൻസ് എടുത്ത്, എന്റെ കാശിനു വാങ്ങിച്ച ബൈക്കിൽ വരുന്നതിന് ചേട്ടനെന്തിനാ ഇത്ര ചൊരുക്ക്…..”
പ്രിയ അവനു മുന്നിൽ കൈകെട്ടിയിരുന്നു…. അപ്പോഴേക്കും വൈഷ്ണവിയും ഭൂമികയും അവിടേക്ക് എത്തിയിരുന്നു, കോളേജിൽ വന്ന വിദ്യാർത്ഥികളിൽ ചിലർ അവരുടെ സംസാരം കേട്ട് അങ്ങിങ്ങായി കൂടി….ദേവപ്രിയയുടെ മുഖത്തെ പുച്ഛവും നിസാര ഭാവവും കണ്ട് കാശിനാഥന്റെ മുഖത്ത് രക്തം ഇരച്ചുകയറി….