Posted by
“സാരമില്ല ഗോള്ഡേച്ചി.” ഞാൻ ചിരിയടക്കി പറഞ്ഞു.
അപ്പോ എന്നെ എങ്ങനെയെങ്കിലും എണീപ്പിച്ച് എന്നോട് എന്തെങ്കിലും സംസാരിച്ചു കൊണ്ട് കിടക്കാനുള്ള ആഗ്രഹം കൊണ്ടാണ് ഈ കള്ളി മിസ്സ് കള്ളത്തരം കാണിച്ച് എന്നെ എണീപ്പിച്ചത്, അല്ലേ..!! സത്യത്തിൽ എനിക്ക് ഭയങ്കര സന്തോഷമാണുണ്ടായത്.
“സമയം എന്തായി..?” പെട്ടന്നുണ്ടായ കൊടുവ എന്റെ കൈ ഉപയോഗിച്ച് മറച്ചു കൊണ്ട് ഞാൻ ചോദിച്ചു.
“3:45..” മിസ്സ് പറഞ്ഞു.
“അത്രയുമായോ..!! അപ്പൊ ഞാൻ രണ്ട് മണിക്കൂറില് കൂടുതൽ ഉറങ്ങിയല്ലേ..?” ഞാൻ ചോദിച്ചു.
“മ്മ്..” മിസ്സ് എന്നെ തന്നെ ഒരു തരം ഇഷ്ട്ടത്തോടെ നോക്കി കൊണ്ട് മൂളി.
“ഗോള്ഡേച്ചി എപ്പഴാ ഇങ്ങോട്ട് വന്നത്..?” ഞാൻ തിരക്കി.
“ഇപ്പം വന്നതേയുള്ളു. ഞാൻ ഹാളിലെ വെളിച്ചത്തിൽ നിന്നും പെട്ടന്ന് ഇങ്ങോട്ട് വന്നപ്പോ റൂമിൽ നല്ല ഇരുട്ടായി തോന്നി. അതുകൊണ്ട ലൈറ്റിട്ടത്. പക്ഷേ ഓഫാക്കാൻ മറന്ന് നിന്റെ അടുത്ത് വന്ന് കിടന്നതും നീ ഉണരുകയും ചെയ്തു”
“ഓഹോ…” ലൈറ്റ് ഓഫാക്കാൻ മറന്നുവെന്ന നുണ പിന്നെയും കേട്ട് എനിക്ക് പിന്നെയും ചിരി വന്നെങ്കിലും ഞാൻ എങ്ങനെയോ അടക്കി. “ഇത്രയും നേരം നിങ്ങൾ രണ്ടുപേരും എന്തോ ചെയ്യുവായിരുന്നു..?”
“ഞങ്ങൾ എന്തു ചെയ്യാൻ..? വെറുതെ അതുമിതും സംസാരിച്ചിരുന്നു, അത്രതന്നെ.” പെട്ടന്ന് മിസ്സിന്റെ മുഖത്ത് നല്ല അസൂയയും ദേഷ്യവും പ്രത്യക്ഷപ്പെട്ടിട്ട് അതേ വേഗത്തിൽ മറഞ്ഞു. “പിന്നെ അവള്ക്ക് നല്ല ക്ഷീണമാണ് പോലും —” മിസ്സ് പല്ലുകൾ ഞെരിച്ചു കൊണ്ട് പറഞ്ഞു, “ഇനി ഒരു 7 മണി കഴിഞ്ഞ് അവളെ എണീപ്പിച്ചാൽ മതിയെന്ന് പറഞ്ഞിട്ടാണ് അവളുടെ റൂമിലേക്ക് പോയത്. അപ്പൊ ഞാനും കുറച്ചു നേരം ഉറങ്ങാനായി ഇങ്ങോട്ട് വന്നു. പക്ഷേ വന്ന് കിടന്നപ്പോ എനിക്ക് ഉറക്കവും വരുന്നില്ല.” അത്രയും പറഞ്ഞിട്ട് എന്നെ കുറ്റപ്പെടുത്തും പോലെ മിസ്സ് ഒരുനിമിഷം എന്നെ തുറിച്ചുനോക്കി കൊണ്ട് കിടന്നു.