Posted by ഇത്രയും പറഞ്ഞു നിർത്തിയ ശേഷം ഞാനൊന്ന് അമ്മയെ നിർവികാരതയോടെ നോക്കി…
“”മ്ച്ചും…”” അമ്മ ഒന്നും മിണ്ടാതെ ഇല്ലാന്ന് തല കുലുക്കി കാട്ടി..അത് കണ്ടപ്പോ ശെരിക്കും എനിക്ക് ചിരി പൊട്ടി.. പക്ഷെ അത് കടിച്ച്പിടിച്ചോണ്ട്…
“”ആട്ടെ ഇന്നെന്തേലും കഴിച്ചോ… എവിടന്ന് അല്ലേ… ഹ്മ്മ്…. ഒരു മുക്കാ മണിക്കൂർ.. ഞാൻ ദേ ചിക്കൻ വാങ്ങിണ്ട്.. കുക്കർ ബിരിയാണി ഉണ്ടാക്കി തെരാ..”” കൈയ്യിലെ കവർ പൊക്കി കാണിച്ചോണ്ട് ഞാൻ പറഞ്ഞു..
“”പിന്നെ പ്ലേറ്റിൽ ഇടണത് മൊത്തോം ഒരു വറ്റ് പോലും കളയാണ്ട് തിന്നോണം ട്ടാ..…
നീ എന്തേലും കഴിച്ചോടി…”” അമ്മുവിന്റെ നേർക്ക് തിരിഞ്ഞോണ്ട് ഞാൻ ചോദിച്ചു..
“”ഞാൻ ഉച്ചക്ക് ശ്യാമള ഏച്ചിടെ വനിതാ ഹോട്ടലിന്ന് കഴിച്ചു അയ്ന് ശേഷം ഒന്നും കഴിച്ചില്ല്യ..””
“”ഹ്മ്മ് .. “” അമ്മൂനെ നോക്കി ഒന്ന് മൂളിക്കൊണ്ട് ഞാൻ അടുക്കളെലോട്ട് നടന്ന്.. പിന്നാലെ വന്ന അച്ഛനെ അമ്മേരെ അടുത്ത് പിടിച്ച് ഇരുത്തി ..
“”നിങ്ങൾ രണ്ടും ഇവിടെ നേരത്തെ പാതിക്ക് നിർത്തിയ റൊമാൻസ് ഫുൾ ആക്ക് അപ്പോളേക്കും ഞാൻ ബിരിയാണിയുമായി വരാ…””
ഞാൻ അടുക്കളേലോട്ട് പോയപ്പോ അച്ഛൻ അമ്മയോടായി ചോദിച്ചു..
“”എന്റെ അനുവേ… എല്ലാരേം വരച്ച വരേൽ നിർത്തി പുലി പോലെ നടക്കണ നീ.. നീയെന്താ കുട്ടന്റെ മുന്നീ മാത്രം പൂച്ച പോലേ ഒതുങ്ങി നിക്കണേ??… എന്താ രമണ??…””
“”അത് ഇണ്ടല്ലോ ഏട്ടാ… അത് പിന്നെ അവന്റെ കൈയ്യിന്ന് അടി കിട്ടുന്നു പേടിച്ചിട്ടാ… “”അമ്മ കൊഞ്ചിക്കൊണ്ട് ഒരു ചിരിയോടെ പറഞ്ഞു..
അപ്പോഴേക്കും ഞാൻ അടുക്കളേൽ ബിരിയാണിക്ക് ഉള്ള ചിക്കൻ പീസ് കഴുകി ഉപ്പും മുളകും മഞ്ഞളും തേച്ച്.. അത് 10 മിനുട്ട് റെസ്റ്റിനു വെച്ചു.. ആ സമയത്ത് മൂന്നു വലിയ സവോള എടുത്ത് നീളത്തിൽ കുനു കുനാന്ന് അരിഞ്ഞു..കൂടെ ഒരു തക്കാളിയും നാല് പച്ചമുളകും അരിഞ്ഞെടുത്തു.. എന്നിട്ട് ഇഞ്ചിയും വെളുത്തുള്ളിയും നന്നാക്കി മിക്സിടെ ചെറിയ ജാറിൽ ഇട്ട് രണ്ട് അടി അത്രേ വേണ്ടു..ചെറുതായൊന്നു ചതഞ്ഞു കിട്ടിയാ മതിയാവും..