Posted by ‘ അപ്പോഴേക്കും എന്റെ മനസ്സിൽ ഒരു നൂറു ചോദ്യങ്ങൾ ഉയർന്ന് വന്നിട്ടിന്നുണ്ടായിരുന്നു..’
വൈകുന്നേരം ഞങ്ങൾ രണ്ടുപേരും നേരത്തെ തന്നെ ഇറങ്ങിയിട്ടുണ്ടായിരുന്നു ഞായറാഴ്ചകളിൽ മടിവാളയിലെ തിരക്ക് ഒന്ന് പറഞ്ഞ് അറിയിക്കേണ്ടത് തന്നെയാണ്..
ബി ടി എം ഫസ്റ്റ് ഏജും സെക്കൻഡ് സ്റ്റേജും തവരക്കരയും കോർമംഗലയുമടക്കം എല്ലാവരും മാരുതി നഗറിൽ ഉണ്ടാവും..
ആ കൂട്ടത്തിൽ ഒരു ഫാമിലിയായി ഞങ്ങളും അങ്ങ് കയറി കൂടി.. സെൻറ് ജോൺസിന് തുടക്കം മുതൽ പിന്നെ അങ്ങോട്ട് ഇരുവശങ്ങളിലും വെട്ടവും വെളിച്ചവുമായി ശരിക്കും ഒരു മലയാളി നഗർ തന്നെയാണ്
ഇവിടം…..
ആദ്യമേ പ്ലാൻ ചെയ്തു വെച്ചതുപോലെ ഞങ്ങൾ പോയത് മന്തി കഴിക്കാനായിരുന്നു മന്തി കഴിച്ച് നേരെ പോയത് വഴിയോര കച്ചവടങ്ങളിലേക്ക്…
സ്റ്റെല്ല ജിമിക്കി കമ്മലിന് വില ചോദിച്ചും ചെറിയ വസ്ത്രങ്ങൾക്ക് വിലപേശിയും ഞങ്ങൾ തെരുവുകളിലൂടെ ആസ്വദിച്ച് നടന്നു…
ബാംഗ്ലൂരിന്റെ മാത്രം സ്പെഷ്യാലിറ്റിയാണ് വഴിയോരങ്ങളിൽ തങ്ങിനിൽക്കുന്ന ഈ മഞ്ഞ വെളിച്ചം അതിന് കീഴെ നാനാ ദേശങ്ങളിൽ നിന്നും വന്നുകൂടുന്ന ഒരു പറ്റം ആൾക്കാർ…
” ആൽബി എനിക്ക് ഒരു കാര്യം സംസാരിക്കാൻ ഉണ്ട്… ”
ചെറിയൊരു മുഖവുരയോടെ ആണ് നടത്തത്തിനിടയിൽ സ്റ്റെല്ല തുടങ്ങിയത്.
‘ എന്താണ് ? ‘ എന്ന മട്ടിൽ ഞാൻ അവളുടെ മുഖത്തേക്ക് നോക്കി.
” ഞാൻ കുറച്ചു ദിവസം ബാംഗ്ലൂരിൽ നിന്ന് മാറി നാട്ടിൽ പോയി നിന്നാലൊ എന്ന് ആലോചിക്കുകയാണ്..!! ”
” അതെന്നാ പെട്ടെന്ന് ? ”
” ഒന്നുമില്ല ഓഫീസിലെ തിരക്കും ഓരോ ഓട്ട പാച്ചിലും എല്ലാം കൂടി ആകെ മൈൻഡ് ഒന്ന് ഫ്രീ ആകുന്നില്ല..! സൊ കുറച്ചു ദിവസം നാട്ടിലേക്ക് പോയി ഫ്രഷ് ആയിട്ട് വരാം എന്ന് കരുതി ”
സ്റ്റെല്ല നടത്തത്തിനടയിൽ എന്റെ ചോദ്യത്തിനുത്തരവും നൽകി.