🤾മോനൂട്ടൻ്റെ സ്വന്തം ടീച്ചർ🧕 [ചിക്കു]

എടാ മോനൂട്ടാ . ഇങ്ങ് വാട.. ! നീ എവിടെക്കാ ഈ പായണെ ” എന്നും ചോദിച്ചുകൊണ്ട് തലക്ക് കൈയ്യും കൊടുത്ത് പൗലോ മാപ്ല അവനെ വിളിച്ച് കൊണ്ട് തിരിഞ്ഞ് നിന്നു .

മോനു വല്യപ്പച്ചൻ്റെ വിളിക്ക് മൈൻ്റ് പോലും ചെയ്യാതെ ചാമ്പക്കാ മരത്തിൻ്റെ ചോട്ടിലെത്തിയ ശേഷം ചുറ്റിനും ആരെങ്കിലും കാണുന്നുണ്ടോ എന്ന് പരതി നോക്കി . മരത്തിന് ചുവട്ടിൽ കുറച്ച് ചാമ്പങ്ങകൾ പൊഴിഞ്ഞ് ചാടിയും കിളികൊത്തിയും താഴെ വീണ് കിടക്കുന്നുണ്ടായിരുന്നു . എന്നാൽ മോനുവിനാവശ്യം മരത്തിൽ തൂങ്ങി നിൽക്കുന്ന ഫ്രഷ് ചാമ്പങ്ങയായതിനാൽ അവൻ അത് എത്തി പറിക്കാൻ വേണ്ടി ചാട്ടം തുടങ്ങി .

രണ്ട് മൂന്ന് വട്ടം ചാടിയിട്ടാണ് അവന് ഒരെണ്ണമെങ്കിലും കിട്ടിയത് . പക്ഷേ ഒരെണ്ണമൊന്നും പല്ലിലൊട്ടാൻ തികയത്തില്ലായിരുന്നു മോനുവിന് . അവൻ വീണ്ടും ചാടിക്കൊണ്ടിരുന്നു . പൗലോ മാപ്ല തച്ചിന് നിന്ന് വിളിയാണ് അവനെ . പക്ഷേ അതൊന്നും മോനു മുഖവിലക്കെടുക്കാതെ ചാട്ടം തുടർന്നുകൊണ്ടിരുന്നതും …

എടാ ” ജോമോനെ … വാട ഇങ്ങോട്ട് . മ് ഇവിടെ വാ മര്യാദക്ക് .
എന്നുള്ള വല്യപ്പച്ചൻ്റെ ശബ്ദത്തേക്കാൾ പരുക്കമായ സ്ത്രീ ശബ്ദം കേട്ടതും മോനു ശരിക്ക് ഭയന്നു പോയി . അവൻ ശബ്ദം കേട്ട ഭാഗത്തേക്ക് തിരിഞ്ഞ് നോക്കിയതും അതാ നിൽക്കുന്ന മഠത്തിൻ്റെ വരാന്തയിൽ മുഴുത്ത ചൂരലും പിടിച്ചുകൊണ്ട് മദർ സുപ്പീരിയറായ റബേക്കാ സിസ്റ്റർ . അവരുടെ ആ നിൽപ് കണ്ടതും മോനൂട്ടന് മുട്ടുകാൽ തമ്മിൽ കൂട്ടിയിടിക്കാൻ തുടങ്ങി .

നീ ഇങ്ങ് വരുന്നോ… അതോ ഞാനങ്ങോട്ട് വരണോ ? സിസ്റ്ററിൻ്റെ കലിപ്പൻ ചോദ്യം കേട്ട് മോനു പേടിച്ച് വിറച്ച് വല്യപ്പച്ചനേയും റബേക്കാ സിസ്റ്ററിനേയും മാറി മാറി തിരിഞ്ഞ് നോക്കിക്കൊണ്ട് പേടിയോടെ അവൻ സിസ്റ്ററിൻ്റെ അടുത്തേക്ക് നടന്നു .