Posted by
“കണ്ണാ ഇയ്യ് തറവാടിനേപ്പറ്റീം അച്ഛച്ഛനെപ്പറ്റീം ഒക്കെ പറയുമ്പോ ഞാൻ കരുത്യേത് അൻ്റേത് ഏതോ മന്ത്രവാദി കുടുംബാന്നാ. പിന്നെ അൻ്റെ കാര്യൊന്നും ഇയ്യ് അങ്ങനെ ആരോടും പറയലൂലല്ലോ. ഇയ്യ് മിസ്സിനെ രേണൂന്നല്ലേ വിളിക്കല്? നമ്പൂതിരിമാര് വെജിറ്റേറിയൻസല്ലേ”?
“രണ്ട് കൊല്ലായി നമ്മള് പരിചയപ്പെട്ടിട്ട്. നീ ചോദിക്കാത്തത് കൊണ്ടാ. ചോദിച്ചാൽ ഞാൻ പറയും. ഫിസിക്സ് ഡിപ്പാർട്ട്മെൻ്റില് കയറി ചെല്ലുന്നോടത്ത് ഡിപ്പാർട്ട്മെൻ്റിലെ എല്ലാവരുടേം പേരെഴുതിയ ബോർഡിൽ ഡോക്ടർ രേണുക ജാതവേദൻ അസിസ്റ്റൻ്റ് പ്രൊഫസർ എന്നൊരു പേര് ഉണ്ടായിട്ട് നീ ഇതുവരെ അത് കണ്ടില്ലേ? ഇല്ലം ആണെങ്കിൽ ആറളത്താണ്. ബത്തേരിയിലത് വേറെ ഒരു വീടാ. നിൻ്റെ ഉപ്പക്കറിയാം അതൊക്കെ. ഉമ്മക്കും അറിയാം. ഞാൻ സീ ഫുഡും മട്ടനും കഴിക്കും”
“അത് ഞാൻ കണ്ടീണ്ട്. ആരാ നമ്പൂതിരിയാന്ന് വിചാരിക്കണത്. ജാതവേദൻ ഭർത്താവാന്ന് കരുതി. അച്ഛച്ഛനാന്ന് ആർക്കാ അറിയണത്. അൻ്റെ ഫാമിലിയില് മൊത്തം ട്രാജഡിയല്ലേ. അതോണ്ട് ചോദിക്കാഞ്ഞതാ. ഉമ്മച്ചീം വാപ്പേം ഇയ്യല്ല വേറെ ആരായാലും ഉപ്പാൻ്റെ പേരെന്താ ഉമ്മാൻ്റെ പേരെന്താ ഏത് തറവാടാ എവിടുത്ത് കാരനാന്നൊക്കെ ചോദിക്കും”
“അതാണ് പീക്ക് കോമഡി. ഏറ്റവും അടുപ്പം നിന്നോടല്ലേ ജംഷീ? ഡീറ്റെയിൽസൊന്നും അറിയാത്തതും നിനക്ക് തന്നെയാ”
“ആരടാ അതിന് കുടുംബ ചരിത്രൊക്കെ മാന്താൻ പോണത് ”
അവർക്കൊന്നും അറിയാത്ത കാര്യങ്ങളായത് കൊണ്ട് എല്ലാവരും ഒക്കെ കേട്ടിരിക്കുകയായിരുന്നു. ഉമ്മ എൻ്റെ തൊട്ടടുത്ത് ചാരി കിടന്ന് ഉറങ്ങുന്നു.