Posted by ആ കളരിക്ക് ശേഷം നാട്ടിൽ കളരി എന്നന്നേക്കുമായി നിരോധിച്ചിരുന്നു . സിസിലി എല്ലാം മറന്ന് ഭയങ്കര പ്രതാപത്തോടെ തൻ്റെ സാമ്പത്തികം കൂടുതൽ മെച്ചപ്പെടുത്തുന്നതിൽ ശ്രദ്ധ കേന്ദ്രീകരിച്ചു . നാടും നാട്ടാരും എല്ലാം പഴയത് പോലെ എല്ലാം മറന്ന് ജീവിച്ചു .
തമ്പുരാട്ടി പോയി രണ്ട് വർഷങ്ങൾക്ക് ശേഷം വരദൻ അസുഖം മൂർച്ചിച്ച് മരിച്ചു .തമ്പുരാട്ടിയുടെ വസ്തു വകകളെല്ലാം കുടുംബക്കാർ പങ്കിട്ടെടുക്കുകയും ഇല്ലം കാട് കയറി തരിശാവുകയും ചെയ്തു .
തമ്പുരാട്ടിയുടെ അച്ചനും അമ്മയും Dr പ്രമീളയുടെ വീട്ടിലാണ് താമസം .
പ്രീതി വിവാഹവും കഴിഞ്ഞ് വേറെ ഏതോ നാട്ടിൽ ജീവിക്കുന്നുണ്ട് എന്ന കരക്കമ്പി ഇക്കരയിൽ പരന്നിരുന്നു . കിട്ടു മൂപ്പൻ കിടപ്പിലാണ് .
പലരും ചാത്തൻ തുരുത്തിൽ പോയി പരതി നോക്കിയിട്ടും തമ്പുരാട്ടിയുടെ ഒരു പൊടി പോലും കിട്ടിയതുമില്ല . പ്രീതിയുടെ ഒളിച്ചോട്ട വിവാഹം ആയത് കാരണം കറക്ട് അവൾ ഏത് നാട്ടിലാണ് താമസിക്കുന്നതെന്ന് ആർക്കും ഒരു അറിവുമില്ലായിരുന്നു. ചുരുക്കി പറഞ്ഞാൽ തമ്പുരാട്ടിയെ ആരും ഓർക്കാതെ വരെയായി .
എന്നാൽ ആൽബിൻ മാത്രം ഒഴിവ് സമയങ്ങൾ ചിലവഴിച്ചത് പുഴക്കരയിലായിരുന്നു .
എന്നെങ്കിലും തമ്പുരാട്ടി പുഴ നീന്തി കടന്ന് തന്നെ കാണാൻ വരും എന്ന് അവൻ ഉറച്ച് വിശ്വസിച്ചു.
മനസ് കായുന്ന നേരം ഒറ്റക്ക് പുഴക്കരയിൽ വന്ന് ചാത്തൻ തുരുത്ത് നോക്കി തമ്പ്രാട്ടി ഇത് തമ്പ്രാട്ടീടെ കണ്ണനാ എന്ന് അവൻ ഉറക്കെ വിളിച്ച് പറയുമായിരുന്നു . അവന് മറുപടി എന്നോണം കണ്ണാ മോൻ വിഷമിക്കണ്ട കേട്ടോ തമ്പ്രാട്ടി കൂടെയുണ്ട് എന്ന് ഒരശരീരി അവൻ്റെ കാതിലും മുഴങ്ങുന്നത് അവൻ കേൾക്കുമായിരുന്നു .