🏘️ബോസ്റ്റൻ ബംഗ്ലാവ് 21 [Gladiator] [𝐂𝐋𝐈𝐌𝐀𝐗]

ഫെഡറിക്ക് ലൈലയോട് സംസാരിക്കുന്ന സമയം ഫെഡറിക്കിന്റെ പിന്നിലായി കത്രീനയുടെ ആത്മാവ് പ്രത്യക്ഷപ്പെട്ടു. അവൾ പിന്നിൽ വന്നത് ഫെഡറിക്ക് അറിഞ്ഞിട്ടില്ല.കത്രീന ശബ്ദമുണ്ടാക്കാതെ ഫെഡറിക്കിന്റെ പിന്നിലായി മുട്ട് കുത്തി ഇരുന്നു. തന്റെ മുന്നിൽ നിൽക്കുന്ന ഫെഡറിക്കിന്റെ കാലുകൾക്കിടയിലൂടെ ലൈല നിലത്തിരിക്കുന്ന കത്രീനയെ കണ്ടു.അവർ പരസ്പരം കണ്ണുകൾ കൊണ്ട് സന്ദേശം കൈമാറി.

“ലൈല…നിനക്ക് ഞാനൊരവസരം തരാം…എന്നോടൊപ്പം ചേർന്നാൽ നിന്നെ ഞാൻ വെറുതെ വിടാം, മാത്രമല്ല നിന്നെയും നിന്റെ ഭർത്താവ് ആന്റണിയെയും ഞാൻ ഒരുമിപ്പിക്കാം…”ഫെഡറിക്ക് ലൈലയെ നോക്കി പറഞ്ഞു “കയ്യിലിരിക്കുന്ന മാന്ത്രികപ്പൊടി വലിച്ചെറിയു….”

“ലൈല…നോ…. അരുത്”ഡാനിയേൽ അവളെ നോക്കി. “ആന്റണി മരിച്ചു. ഐ മീൻ, ഐ തിങ്ക് സോ.ഞാനവനെ കണ്ടു..ഇവൻ.. ഈ ഫെഡറിക്ക് അയാളെ കൊന്നെന്ന് തോനുന്നു..”

ഡാനിയുടെ വാക്കുകൾ ഇടിത്തീ പോലെ ലൈലയുടെ മനസ്സിൽ പതിച്ചു. അവളുടെ വെളുത്ത മുഖം രോഷത്താൽ ചുമ്മന്നു കയറി.അവൾ ഡാനിയേയും ഫെഡറിക്കിനെയും മാറി മാറി നോക്കി.പെട്ടെന്ന് ലൈല കയ്യിലിരുന്ന മാന്ത്രികപ്പൊടി അടങ്ങിയ പൊതി നിലത്തേക്കിട്ടു, ഒരു കാൽപ്പന്ത്‌ കളിക്കാരിയുടെ മികവോടെ അവളാ പൊതി ഫെഡറിക്കിന്റെ കാലുകൾക്കിടയിലൂടെ അവന്റെ പിറകിലായി നിലത്ത് മുട്ട് കുത്തി ഇരുന്ന കത്രീനയുടെ അടുത്തേക്ക് പാസ്സ് ചെയ്തു.പൊതി കയ്യിൽകിട്ടിയ കത്രീന ഫെഡറിക്കിന് ചുറ്റും ലൈല വരച്ച അർദ്ധവൃത്തം ഞൊടിയിടയിൽ കയ്യിൽ കിട്ടിയ പൊടി കൊണ്ട് പൂർത്തിയാക്കി.